गुरुवार, 2 मार्च 2017

चुनावन के दिन मा बड़ा मजा आई

चुनावन के दिन मा बड़ा मजा आई
रास्ता कय गदहे भी ओढ़िहैं रजाई
चुनावन के दिन मा बड़ा मजा आई

कुत्तन का मिलिहै दूध-औ बिस्कुट
घोड़न का कच्चा चना-औ तिलकुट
खच्चर कय सब होय जाई सगाई
चुनावन के दिन मा बड़ा मजा आई

चूहा का बिल्ली से निजात दिलाइब
बिल्ली का जमकय चूहा खिलाइब 
मछलिन के ताईं सगरा खुद जाई
चुनावन के दिन मा बड़ा मजा आई

नाली कय किरवा सब दारू नहाइहैं
गंगा कय प्राणी सब आंख चोरैइहैं
बुलबुल के बानी मा प्रचार समाई
चुनावन के दिन मा बड़ा मजा आई

घोड़ी पर चढ़िहैं चोर-औ उचक्के
गाड़ी पर नचिहैं लगायकय सुट्टे
तोता-औ-मैना कय पिंजरा रंगाई
चुनावन के दिन मा बड़ा मजा आई
-विशाल शुक्ल अक्खड़

कोई टिप्पणी नहीं: